Idara ya Kilimo, Umwagiliaji na Ushirika ni moja ya idara nyeti katika Halmashauri ya Manispaa ya Ilemela kutokana na ukweli kwamba asilimia 65 ya wakazi wa Manispaa wanajishughulisha na Kilimo, na kwamba kilimo ni uti wa mgongo wa Taifa. Manispaa ina jumla ya hekta 11,074 zinazofaa kwa kilimo lakini mpaka sasa kilimo kinafanyika ndani ya hekta 6,769 tu. Manispaa inayo mabonde yenye jumla ya hekta 1,072 kwa ajili ya kilimo cha mbogamboga na matunda. Tunazo fursa nyingi za kutekeleza kilimo ikiwemo uwepo wa Ziwa Victoria kwa ajili ya upatikanaji wa maji, wataalam, masoko ya bidhaa mbalimbali za kilimo na uongozi imara ambao wanatoa mchango mkubwa katika sekta ya kilimo ikiwemo kutafuta wafadhili watakaowasaidia wakulima kuzalisha zaidi na kuongeza kipato chao. Zipo changamoto mbalimbali zinazoikabili sekta ya kilimo katika Manispaa ya Ilemela. Mojawapo ni wakulima kutegemea mvua, bei kubwa za pembejeo na zana za kisasa, uhaba wa masoko, na uvamizi wa visumbufu vya mazao. Ili kutatua changamoto hizi, ni vema Serikali katika ngazi zote ikatilia mkazo katika upatikanaji wa maji mbadala wa mvua kwani hali ya mabadiliko ya tabia nchi inaendelea kuwa chagamoto kubwa kwa wakulima. Pia wakulima wasaidiwe kupitia vikundi vyao wenyewe, taasisi za kifedha na wafadhili mbalimbali kupata pembejeo na zana za kisasa ili waweze kuzalisha zaidi.
SHUGHULI ZINAZOTEKELEZWA
Kutoa mafunzo ya kanuni bora za kilimo kwa wakulima ikiwemo upandaji kwa nafasi na kwa wakati, matumizi ya pembejeo, zana na teknolojia za kisasa, teknolojia za umwagiliaji na kilimo hai. Mafunzo haya yanatolewa kwa njia mbalimbali ikiwemo mihadhara, mijadala, mashamba darasa, mashamba ya mfano na ziara za mafunzo kwa mtu mmojammoja vikundi na kwenye mikutano.
Kutoa mafunzo ya matumizi bora ya ardhi kwenye maeneo ya kilimo kwa kupanga na kugawa matumizi ya ardhi kwa shughuli mbalimbali ikiwemo kuongeza uzalishaji kwa eneo
Kutoa taarifa mbalimbali zinazohusu sekta ya kilimo, mfano ni wapi pembejeo zinapatikana, hali ya masoko, uwezesho wa kifedha na hata mashirika yanayowasaidia wakulima kupata mahitaji yao mbalimbali
Kuwasaidia wakulima kuanzisha na kutunza vitalu vya mbegu za mboga na matunda kwa ajili ya kukuza mazao ya bustani
Kufanya maonesho mbalimbali katika ngazi za mitaa na kata kupitia siku za wakulima, na hata ngazi ya wilaya kupitia maonesho ya nanenane.
Kutoa mafunzo ya hifadhi ya mazao ya kilimo kwa kuzingatia viwango vinavyohitajika na matumizi ya viuatilifu vya mazao ya kilimo ghalani
Kuwatembelea wakulima, kuona changamoto wanazokutana nazo na kutoa ushauri wa jinsi ya kutatua changamoto hizo.
Kutoa tuzo na zawadi mbalimbali kwa wakulima ili kuwahamasisha wenzao kupenda kufanya vizuri zaidi. Hii inaleta ushindani ambao hatimae unasababisha ongezeko la uzalishaji kwa ujumla
JINSI HUDUMA ZINAVYOPATIKANA
Huduma hizi hutolewa ndani ya Manispaa kwa njia zifuatazo
Kupata ushauri wa moja kwa moja toka ofisi ya Kilimo, Umwagiliaji na ushirika katika Manispaa
Kupata ushauri wa ana kwa ana toka kwa wataalam wa wilayani, katani au kwenye mtaa katika shamba la mkulima
Kupata ushauri toka ofisi ya kata au ya mtaa
Mafunzo kwa njia ya mikutano ( warsha na semina mbalimbali)
Mafunzo kwa njia ya vikundi kuongea na vikundi
Mafunzo kwa njia ya kujisomea kupitia kituo cha mafunzo kilichopo Sangabuye (kituo hiki bado hakijaanza kutokana na ukosefu wa machapisho)
Ziara za mafunzo
Mafunzo kupitia maonesho mbalimbali ngazi ya mtaa, kata, na wilaya wakati wa siku ya wakulima nanenane
